Þrenna vikunnar: Sjálfvirknivæðingin, auðæfin og frímínúturnar
Þrenna vikunnar: Sjálfvirknivæðingin, auðæfin og frímínúturnar 150 150 Freyr

Sjálfvirknivæðingin

Fjórða iðnbyltingin er hafin! Störf hverfa og breytast. Róbótar taka yfir margt sem áður var óhugsandi! Sumir eru óöruggir, jafnvel hræddir. Ég játa, ég er líka hræddur. Hræddur um þá sem taka ekki sjálfvirknivæðingunni opnum örmum í sínum rekstri! Enn hræddari er ég þó um þá sem taka „róbótana“ í sína þjónustu en láist að virkni-væða sig sjálfa, þ.e.a.s. hreyfa sig, fræðast, vera virk í samfélagi við aðra! Verum skynsöm, verum sjálf virk!

Auðæfin

Hvaða auðæfi eigum við meiri eða mikilvægari en tímann? Gætir þú gætt betur að þínum á einhvern hátt? Eða gengur þú um þinn auð eins og heimsins besta bisnessmanneskja?

Frímínúturnar

Fyrir mann á miðjum aldri getur verið skrýtið til þess að hugsa að barnaskóladagarnir hafi verið í þessu lífi. Svo margt hefur breyst frá því Viðar bóndi á Svanavatni keyrði í gegnum hlaðið heima í Hildisey á gamla Land-Rovernum og ók mér og öðrum niður í skólann í Gunnarshólma.

Við tóku vinnulotur, 40 mínútur að hámarki, við krakkarnir pössuðum vel upp á það! Þeirra á milli hlupum við út á tún (a.k.a. skólalóð) og hömuðumst í fótbolta, snjókasti eða hverju sem hæfði árstímanum, allt þar til kennarar kölluðu okkur inn, alltaf of snemma að okkur fannst!

Já, tímarnir breytast en ekki endilega mennirnir með. Ég hef a.m.k. fundið út að ég vinn enn best í 40 mínútna lotum eftir að hafa hamast úti á túni hér í Laugardalnum. Aðferðin nú kölluð fínu útlensku nafni, pomodoro og vá, hvað ég hefði verið til í að gefa í denn fyrir þann lúxus sem ég bý við núna… ég fæ sjálfur að stilla lengdina á frímínútunum!

Þrenna vikunnar: Lítið og ómerkilegt – Ritstjóri lífsins – Fullkominn hugbúnaður
Þrenna vikunnar: Lítið og ómerkilegt – Ritstjóri lífsins – Fullkominn hugbúnaður 150 150 Freyr

Lítið og ómerkilegt

Hvað þarf til að komast af stað? Stundum er lítið og ómerkilegt best. Að við finnum það minnast og ómerkilegasta sem við getum gert, sem þó kemur okkur ögn nær markmiðinu. Kosturinn við lítið og ómerkilegt er að því þarf ekki að fresta! Tekur því ekki að sleppa! Ein mínúta? Eitt skref? Strax að lestri loknum?

Ritstjóri lífsins

Einu sinni las ég í bók, sem ég er löngu búinn að gleyma hver var, hve snjallt það er að ráða sig sem ritstjóra, þó alls ekki við blaða eða tímaritaútgáfu, enda varla til valtari stólar en ritstjórastólar. Nei, ráðið er að gerast ritstjóri að eigin lífi! Ritstjóri sem veit að til að heildin verði góð þá þarf að klippa út og hafna miskunnarlaust, jafnvel stórgóðum köflum, jafnvel sínum uppáhalds.

Fullkominn hugbúnaður

Ég er ekki aðeins alinn upp í sveit, heldur líka í hugbúnaðargerð. Í þeim bransa lærði ég margt, eins og að fullkomnun er fallegt hugtak en vandmeðfarið. Þannig vann ég einu sinni með hópi af ungu, eldkláru og skapandi fólki að því heilan vetur að skrifa heilan haug af Word skjölum sem lýsti hönnun og virkni hugbúnaðar sem við ætluðum að búa til. Hugmyndin var fullkomin. Allt var gert samkvæmt aðferð þess tíma, „Waterfall“. Ótal fundum og blaðsíðum síðar lá fyrir hin fullkomna afurð, fullkomin lýsing á fullkomnum hugbúnaði. Fullkomið ferli ekki satt? Það var bara eitt „smáatriði“ sem var ekki upp á tíu. Okkur láðist að spyrja, fyrir hvern? Fyrir utan hópinn sem kom að „hugbúnaðargerðinni“ var því miður enginn áhugi á vörunni. Það var enginn viðskiptavinur! Fullkomið klúður!

Eftir stendur því enginn forritskóði eða hugbúnaður, en góðar minningar og þessi ófullkomna saga, enda fullkomnun stórvarasöm! 😇

Þrenna vikunnar: Sóunar bingóið – Spurningar og svör – Kassarnir mínir
Þrenna vikunnar: Sóunar bingóið – Spurningar og svör – Kassarnir mínir 150 150 Freyr

1-Sóunar bingóið

Ein mesta gleðin í ferlagreiningum, er að finna „fullkomna“ sóun. Endurtekin verk sem eru óþörf, án þess að nokkur hafi áttað sig á því.

Prófaðu að rýna í verkefnalistana og ferlana og spyrja þig, eða þitt fólk: Af hverju? Ítrekað, eins og forvitið barn varðandi hvern lið. Ef lokasvarið við spurninga-rununni er „bara“, eða „við höfum alltaf gert þetta svona“, þá gæti verið komið bingó!

2-Spurningar og svör

Ég titla mig ráðgjafa. Réttnefni? Ekki endilega. Í mínum huga er nefnilega engin spurning að krefjandi spurningar og góðar þagnir færa viðmælandanum fleiri svör en að ryðja frá sér ráðum.

3-Kassarnir mínir

Ég hef mikla trú á „kössum“ og lotum til að afkasta, föstum venjum og nota sjálfur nokkra vel valda „kassa“ til að koma frá mér Þrennu vikunnar:

  1. Geymslu-kassinn minn er í Notion, þangað hendi ég inn hugmyndum, hvenær sem þær koma til mín yfir vikuna. Ágætis geymsla, í dag með 300 punktum sem bíða síns tíma 😅
  2. Klukkan 7 á þriðjudagsmorgni, að lokinni léttri æfingu, stíg ég inn í kassa sem bíður mín á dagatalinu, legg hendur á lyklaborðið og byrja að skrifa. Skrifa þar til ég er kominn með (helst) þrjár hugmyndir, en þó aldrei lengur en til klukkan 9, með einni pásu í kringum 8 til að kveðja fólkið mitt.
  3. Klukkan 9:00 á fimmtudagsmorgni loka ég síðasta kassanum þegar ég ýti á takkann og sendi frá mér Þrennu vikunnar. Klukkutímana á undan fínisera ég og bý til birtingar, alltaf í næði, alltaf eftir einhverja hreyfingu.

Með kassana á sínum stað í dagatalinu, tryggi ég að hausinn hlaupi ekki útundan sér. Hafi sinn ramma, svo þú fáir örugglega Þrennu vikunnar. Ætli megi ekki kalla mig ferkantaðan? Eða hálfgerðan pappakassa? 🙂

Þrenna vikunnar: Hnefinn og brosið, um eitt skipti og áratug, eldavélarhellu og endurgjöf
Þrenna vikunnar: Hnefinn og brosið, um eitt skipti og áratug, eldavélarhellu og endurgjöf 150 150 Freyr

Hnefinn og brosið

Hvenær vinnur krepptur hnefi? Við kreppum hnefann framan í heiminn og hnefi kreppist í eigin kvið. Allir tapa. Er til betri leið?

Hvenær töpum við á því að brosa? Með brosinu færum við heiminum gleði og kviðnum léttleika. Hver sem staðan er. Allir vinna. Er til betri leið?

Eitt sinn

Hvað gerir að sleppa hreyfingu einn dag? Klippa klukkutíma af nætursvefninum? Litlu eitt sinn.

Hvað gerir að skipta út snúð fyrir gulrót? Símahangsi fyrir samveru með vinum? Vatni fyrir vín?Litlu eitt sinn.

Endurtakist í ár, eða áratug og þetta litla eina getur orðið ansi drjúgt. Mjór er mikils vísir.

Eldavélarhellan

Það er svo misjafnt hve hratt við lærum af mistökum. Ör endurgjöf er lykill, það vita þeir sem hafa lagt hönd á heita hellu.

Í lífi og starfi er ör endurgjöf fágæti, of fáar „heitar hellur“ og enginn annar sem kemur þeim fyrir en við sjálf. Okkar er að koma fyrir í dagatalinu stundum þar sem við stöldrum við, skoðum vikuna eða mánuðinn. Hvar fór ég út af sporinu? Af hverju? Hvernig kem ég í veg fyrir feilsporin í næstu lotu?

Án endurgjafar, jafnvel bara sinnar eigin, er erfiðara að læra.

Þrenna vikunnar: 1001 afsökun, fulltrúi djöfulsins, mínútur, orð og virði
Þrenna vikunnar: 1001 afsökun, fulltrúi djöfulsins, mínútur, orð og virði 150 150 Freyr

1 – Þúsund og ein afsökun

Ég hef átt betri vikur, magapest, allt í gangi á öllum vígstöðvum. Átti til 1000 afsakanir til að færa þér ekki þessa Þrennu vikunnar. Kom þá í hug saga sem ég heyrði af miklum meisturum, Kára Jóns, afreksþjálfara Ármenninga og Íþróttasambands fatlaðra og hans skjólstæðingi Patreki, spretthlaupara með meiru. Patti var eitthvað aumur í upphafi æfingar og spilaði út „blinda kortinu“ sem afsökun, enda sannarlega löglega blindur. Kári hallaði sér að Patta og sagði á sinn hlýja og hvetjandi hátt: „Patti minn, það eru allir með 1000 afsakanir, þú ert bara með 1001“. Ég þarf ekki að nefna að Patti skilaði rúmlega sínu á þeirri æfingu sem öðrum.

2 – Fulltrúi djöfulsins

Hver er fulltrúi djöfulsins við þitt borð? Tíundi Ísraelinn? Sá sem hristir upp í hópnum. Kemur með mótrökin, þessa hollu sýn sem fær okkur annað hvort til að sannfærast um að ákvörðunin sé sannarlega rétt, eða efast nóg til að skipta um skoðun.

3-Mínútur, orð og virði

Er eitthvað vit í því að telja (og selja) mínútur í „business“. Á stundum held ég það sé álíka gáfulegt og að meta gagnið af pistlum í fjölda orða. Hvað ertu að láta frá þér? Hvað stendur eftir? Hvers virði er það?

Þrenna vikunnar: Námið, vinskapurinn og liðsuppstillingin
Þrenna vikunnar: Námið, vinskapurinn og liðsuppstillingin 150 150 Freyr

1-Námið

Í mörg ár lærði ég orðflokkagreiningu, stórgóða stærðfræði, hornafræði, heildun, línulega algebru, að ógleymdri efnafræðinni, um sýru-basa indikatora o.fl. Stórmerkilegt stöff var mér sagt, svo gott fyrir framtíðina. Fyrir mig, gjörsamlega gagnslaust.

Á samfélagsmiðlum (Twitter) hef ég undanfarnar vikur lært af frösum eins og: „Oft forðumst við að taka af skarið því okkur finnst við þurfa að læra meira, þegar besta leiðin til að læra meira er oftar en ekki að taka af skarið.“ …og „Skortur á sjálfstrausti drepur margfalt fleiri drauma en skortur á getu!“ Ómerkilegt stöff á ómerkilegum miðli segja sumir. Fyrir mig, gríðar gagnlegt.

Það er svo mikilvægt að halda unga fólkinu að alvöru námi!

2-Vinskapurinn

Tvær vondar vinkonur held ég sé hollt að losa sig við, öðrum fremur. Það eru þær öfund og gremja. Hreint ekki gefandi félagsskapur, sérstaklega ekki til lengdar. Það er fátt mikilvægara en að vera vandur að vinum!

3-Liðsuppstillingin

Það er þægilegt að vera í einsleitu teymi. Sami bakgrunnur, sömu viðhorf, sama kyn, svipaður aldur. Allir meira og minna sammála. Mjög þægilegt. En líklega eins og svo margt, ósköp gott í augnablikinu, en hreint ekki svo hollt til lengdar!

Þó Kári Kristjáns, ungfrú Snæfells og Hnappadals, sé flinkur línumaður, þá færi liðið ekki langt með sjö slíka inná. Hvernig stillir þú upp þínu liði?

Þrenna vikunnar: Skölunin, borgarhundurinn og hamingjan í verkunum
Þrenna vikunnar: Skölunin, borgarhundurinn og hamingjan í verkunum 150 150 Freyr

1-Skölunin

Skölun er skemmtilegt orð. Ómetanlegt í öllum rekstri. Að finna módel þar sem innkoman vex, öllu hraðar en fyrirhöfnin og útgjöldin. Að vinna með vogarafl þannig að hvert handtak verði að hundrað. Hver manneskja sem margir, hvert lítið teymi sem tugir. Að hver og einn geti unnið minna en skilað meiru! Hreint ekki alltaf augljóst, en mögulegt. Leitið og þér munuð finna!

2-Borgarhundurinn

Sem sveitamaður vorkenni ég oft borgarhundunum. Það er líkast til óþarfi. Hjá góðu fólki eru þeir líklega í betri málum en „bakveikir í Borgartúni“*. Hundurinn fær matinn á silfurfati , jafnvel í orðsins fyllstu, með öllum helstu næringarefnum, nægur tími fyrir núvitund og hugleiðslu, skíturinn er skafinn upp eftir þá og hreyfingin, maður lifandi! Ganga eða hlaup kvölds og morgna alla daga, teymdur áfram af elskandi þjálfara! Kannski borgar sig að vera borgarhundur eftir allt saman?!

3-Hamingjan í verkunum

Hamingjan, hún er hér, söng vinur minn Jónas. Holl áminning. Við þurfum þá kannski ekki að bíða eftir næsta stóra díl, að ná á toppinn fyrst hamingjuna má allt eins finna hér, á krókótta stígnum sem við stikum, í erfiðinu í dagsins önn. Eða eins og Tagore sagði: „Ég svaf og mig dreymdi dásemdarlíf. Ég vaknaði og lífið var verkum hlaðið. Ég vann og ég vann og vittu til, í verkunum var mín dásemd.“**

Neðanmáls:

*“Bakveikur í Borgartúni“ er frasi sem Simmi smiður og Bjarni Már bróðir nota gjarnan sem samheiti yfir okkur (of lengi) sitjandi skrifstofumenn.

**Þýðing mín á texta bengalska Nóbelskáldsins Rabindranath Tagore: „I slept and dreamt that life was joy. I awoke and saw that life was duty. I worked—and behold, duty was joy.“

Þrenna vikunnar: Veröld breytinga – Láttu ekki bransann blöffa þig – Hinn og salan
Þrenna vikunnar: Veröld breytinga – Láttu ekki bransann blöffa þig – Hinn og salan 150 150 Freyr

Veröld breytinga

Við ráðgjafar erum sjaldnast kallaðir til til að viðhalda ástandi í rekstri. Kemur þó fyrir. „Þetta er allt í lagi hjá okkur, er það ekki? Við þurfum ekkert að flýta okkur að breyta neinu, er það?“ Vondar fréttir. Veröld dagsins er veröld breytinga, um allan heim. Þar sem nýjungar koma nú jafnt frá Kaliforníu sem Kópaskeri.

Hik er tap. Þín eru tækifærin! Ef þú grípur þau ekki, þá mun sá næsti gera það og gera þig að næst besta kostinum eins og hendi sé veifað!

Láttu ekki bransann blöffa þig!

Þó heimurinn breytist hratt, þá þróumst við sem tegund óskaplega hægt. Bragðskyn okkar hefur þróast í gegnum árþúsundir þannig þeir sem nærðust á sætu, söltu og feitu komu genum sínum frekar til næstu kynslóðar. Að treysta bragðskyninu einu í blindni í dag er varasamt í meira lagi, þökk sé örri þróun í matvælaframleiðslu og þekkingu bransans á okkar innbyggðu veikleikum. Láttu ekki bransann blöffa þig!

Athygli okkar og viðbragð þróaðist eins og annað á óvæginn hátt. Þeir sem ekki tóku eftir, eða brugðust við áreiti, alvöru hættum, hrundu af genavagninum. Að stökkva til og elta allt það sem vill fanga athygli okkar á snjalla skjánum í dag er varasamt í meira lagi. Þökk sé örri þróun í hugbúnaðargerð og þekkingu bransans á okkar innbyggðu veikleikum. Láttu ekki bransann blöffa þig!

Hinn

Ekki gleyma að í sölu og þjónustu þá snýst málið ekki um þig, heldur hinn, um viðskiptavininn, skjólstæðinginn! Hver er hann? Hvað er hann að pæla? Hver eru hans vandamál? Leystu þau og vittu til, báðir brosa við uppgjörið.

Þrenna vikunnar: Um þig sem vörumerki, hvernig þú færð (kannski) meira fyrir minna og hvað góður spegill getur gefið!
Þrenna vikunnar: Um þig sem vörumerki, hvernig þú færð (kannski) meira fyrir minna og hvað góður spegill getur gefið! 150 150 Freyr

Vörumerki

Hver ert þú? Ef þú værir vörumerki, hvernig væri þér lýst? Þegar nafn þitt er nefnt og þú ert hvergi nærri, hvað kemur upp í huga fólks? Hver er ímyndin? Vörumerki tekur langan tíma að byggja upp en aðeins andartak að tapa trausti. Er eitthvað sem þú getur gert í dag sem gerir þitt „vörumerki“ sterkara en það var í gær?

Meira fyrir minna

Getur verið að með því að eyða líkamlegri orku fáir þú meiri andlegra orku?

Getur verið að með „verri“ tölvupóstsvörun, getir þú orðið betri starfsmaður?

Getur verið að með því að „gera minna“ en horfa og hlusta meira getir þú orðið betri stjórnandi/leiðtogi?

Getur verið að með því vinna færri klukkustundir getir þú komið meiru í verk?

Getur verið að með því að sofa meira og fækka vökustundunum, getir þú fjölgað góðu stundunum?

Góður spegill

Ég elska að spegla mig. Þó ekki í þessu gler fyrirbæri sem sýnir nú orðið (mis) krumpaðan grásprengdan miðaldra mann, nei ég er að tala um spurningaspegilinn. Að spegla mig í reglulegum spurningum, endurteknum. Vikulegum spurningum eins og: „Hvað losaði ég mig við í vikunni? Einfaldaði?“, „Er ég sáttur við allar rútínur og venjur? Hverju breyti ég í næstu viku?“, „Hvernig var fjölskylduvikan?“. Alltaf sömu spurningarnar, sjaldnast sömu svörin. Góður spegill.

Þó framangreind speglun geri gagn, þá er það hjóm eitt miðað við það að spegla sig í öðrum. Fá spurningar um langanir, drauma og drifkraft frá traustum félaga, samstarfsmanni, yfirmanni, nú eða það allra besta, topp þjálfara! Kröftugur spegill sem hjálpar þér að kíkja inn í kjarnann, finna út hvað þú vilt í raun. Góður spegill.

Þó við séum missátt við spegilmyndina, þá er lítið annað að gera en að sætta sig við hana. Láttu þig hafa það, kíktu í spegil. Góðan spegil.

NTÍ stokkar upp í UT málum með Stöku stjórnendaráðgjöf
NTÍ stokkar upp í UT málum með Stöku stjórnendaráðgjöf 150 150 Freyr

Íslendingar þekkja óþægilega vel óblíð náttúröflin, sem ekkert fær hamið eða við ráðið. En þó við ráðum ekki við náttúruöflin, þá eigum við hér á landi ágætis ráð til að eiga við eftirköstin. Þar leikur NTÍ, Náttúruhamfaratrygging Íslands, lykilhlutverk. NTÍ tryggir helstu verðmæti gegn náttúruhamförum og því þarf stofnunin alltaf að vera klár með sitt, hvað sem á dynur, til að geta með sem bestum og skilvirkustum hætti stutt við þá sem hafa orðið fyrir skaða.

Til þess að tryggja enn traustari rekstur í UT málum til lengri tíma þá stokkaði stofnunin aðeins upp. Freyr Ólafsson frá Stöku stjórnendaráðgjöf var fenginn til að vinna með NTÍ að þessu verkefni. Nú er árangursríku samstarfi að ljúka. Báðir aðilar kátir því markmið náðust og vel það.

Gengið hefur verið frá nýjum samningum um hýsingu, rekstur og þjónustu við Fjölnet ehf. og við Sensa ehf. varðandi hugbúnaðarleyfi. Samningum sem eru sérstaklega lagaðir að þörfum NTÍ og er ætla að tryggja góðan upplýsingatæknirekstur við hvers kyns krefjandi aðstæður s.s. eftir náttúruhamfarir.

Hulda Ragnheiður segir: „Það er ómetanlegt að fá aðila með sérfræðiþekkingu til að aðstoða við útboð og samningagerð. Það var einstaklega þægilegt að vinna með Frey, hann hefur innsýn í báðar hliðar samningsins, á auðvelt með að setja sig í spor stjórnandans sem kaupir þjónustuna og seljandans sem mun veita þjónustuna til lengri tíma.“

Freyr Ólafsson stjórnendaráðgjafi hjá Stöku ehf.: „Það var sérstaklega ánægjulegt að fá innsýn í kraftinn og útsjónarsemina í rekstri NTÍ. Stofnunin er ekki stór, en öflugt starfsfólk í hverri stöðu, sem er sífellt að leita að leiðum til að bæta sig og sinn rekstur, er sannarlega drauma samstarfsaðili stjórnendaráðgjafans. Það var því engin tilviljun hversu vel þetta verkefnið gekk.“

Að ofan eru þau kampakát saman á mynd Hulda Ragnheiður Árnadóttir framkvæmdastjóri NTÍ, Freyr Ólafsson stjórnendaráðgjafi frá Stöku og Tinna Hallbergsdóttir upplýsingatækni- og þjónustustjóri NTÍ.