Laugarvatn

Af trippum og stuttum lotum
Af trippum og stuttum lotum 150 150 Freyr

Án þess að hallað sé á aðra ágæta kafla ævi minnar þá voru árin á Laugarvatni einhver þau allra bestu. Hvað má hugsa sér betra en að búa með sínum bestu vinum á heimavist? Fá að njóta mótunarára í gleði með góðum hópi jafnaldra, upplifa frábært félagslíf og takmarkalítinn aðgang að íþróttahúsi? Ef til væri himnaríki, þá gæti ég trúað að þar væri svipað fyrirkomulag og á Laugarvatni.

En þó umhverfið væri himneskt, vorum við nemendurnir ekki endilega englar alla daga. Eins og við er að búast í slíkum hópi þá kom fyrir að helsta markmiðið með dvölinni gleymdist, bóknámið fékk gjarnan að víkja fyrir gleðinni. Skipulagið hentaði vel „spretthörðum“ námsmönnum. Litlu og stundum engu máli, skipti frammistaða yfir önnina, endaspretturinn og lokaprófið var allt. Við, mis þroskaðir unglingarnir, fjarri eftirliti og stuðningi foreldra, höndluðum þetta frelsi auðvitað misjafnlega vel.

Auðvitað er ekki stórmannlegt að bölva kerfinu frekar en eigin breyskleika, en ég leyfi mér það samt. Breyskleikinn sýnist mér nefnilega sammannlegur og einskorðast ekkert endilega við óharðnaða unglinga á heimavist, hefur þú t.d. fylgst með atganginum á Alþingi þegar líður að þinglokum?

Fyrir mér er þetta skipulag, skipulag gamla tímans, þó það sé enn praktíserað hér og hvar, jafnvel á æðstu stöðum. Betra tel ég að byggja upp skipulagið líkt og unnið sé með unglingstrippi alla daga, trippi sem eru tilbúin að leyfa gleðinni að ganga fyrir, svo lengi sem ekki er komin stund sannleikans. Regluleg „skil“ geta verið ágætis uppspretta árangurs. Taktviss ör skil (t.d. viku/tveggja vikna/mánaðar) á því sem mestu máli skiptir er það sem við þurfum til að vinna með breyskleikann. Lítil skil, ófullkomin skil, en skil samt, skil til að endurmeta stöðuna, rétta af kúrsinn, læra, sýna, fá viðbrögð, skilja.

Stuttu loturnar halda okkur á tánum og hjálpa hvort sem við viljum afhenda hugbúnað, ná sölumarkmiði, gefa út bók, læra, breyta skipulagi eða setja lög. Alltaf er uppbrotið til gagns. Stuttar lotur tryggja jöfn afköst og hraða. Þó við þurfum að spretta aðeins úr spori, þá er það mun léttara að næstu vörðu, næstu helgi, en ef öll önnin eða árið er undir. 

Einstaka englar hrista sjálfsagt höfuðið yfir þessum óþarfa mínum, en a.m.k. við hin, þessi eilífðar unglingstrippi, tel ég að höfum ekki annað en gagn af góðri girðingu, stuttum lotum til að styðja okkur við.

Kvöldgangan
Kvöldgangan 150 150 Freyr

Löngum og stífum degi loks að ljúka. Yngri drengirnir sofnaðir, eldri börnin á eigin vegum. Hugurinn hamast, næ ekki taki. Les yfir hugmyndir, hringsnýst. Gríp tækifærið og í húninn um leið. Geng í rólegheitum eftir skógarstígnum í haustmyrkrinu. Bíð eftir að finna sjálfan mig. Í hálfrökkrinu þreifa ég á greinum og laufblöðum. Þurr blöðin hanga enn föst á sínum stað. Hlýr andvari. Heyri mildan nið í fjarska. Merkilegt að beljandi bílafljót geti hljómað eins og lækjarniður. Fljóðljósin á vellinum stinga í augun og vekja mig til meðvitundar um hvar ég er.

Með vitund reyni ég að róa hugann. Anda rólega að mér og tel, anda frá mér og tel. Bíð eftir að hitta góða hugmynd á göngu. Enn birtast mér bara hugleiðingar um verkefnaborð, keppnisrétt, löglegar kvittanir og leigurými. Predika um eitt í einu, en snýst sjálfur í hringi á eftir eigin skotti, skyldi ég einhverntímann ná í það? Þvílík vitleysa að bæta pistlunum við!

Geng út af stígnum. Grasið í brekkunni dúar, minnir mig á ræturnar, hún hallar niður eins og brekkan á Laugarvatni. Í huganum hleyp ég niður að vatni. Hleyp með mínum bestu vinum spretti milli ljósastaura. Hleyp í gegnum gufuna sem liðast yfir malbikið. Hamingjusamur á harðaspretti.

Ég næ huganum heim. Byrja að ná áttum í brekkunni í Laugardalnum. Stundum þarf ekki meira en eina mjúka brekku og góða minningu til að ná sér út úr ærustunni. Hugurinn tætti fær loks tómið sem hann þurfti. Stök orð stinga upp kolli, stef myndast. Enginn pistill, en þó fyrirheit. Kannski næ ég að setja eitthvað saman í fyrramálið.

Geng hægt heim. Færi litla bræður í rétt rúm. Næ síma af öðrum unglingnum fyrir svefninn. Þetta áreiti.