næði

Þrenna vikunnar: Stressið, næðið og kostnaðurinn
Þrenna vikunnar: Stressið, næðið og kostnaðurinn 150 150 Freyr

1-Stressið

Stress er hluti af því að vera til. Stress sem við gerum okkur grein fyrir, sem kemur og fer, stress sem við nýtum okkur til að afkasta meira í stutta stund, er ekkert eitur, mætti jafnvel líta á sem orkugjafa. Að festast í vítahring stress, þannig að okkur finnst við ekki komast út úr því, ekki ráða við það, er stórvarasamt. Það allra hættulegast virðist þó vera að vera hræddur við stressið! Já, þú last rétt. Rannsakendur hafa sýnt fram á að viðhorf okkar til stressins hefur jafnvel meiri áhrif á heilsu okkar en stressið sjálft! Magnað?!

Svo nú er tíminn til að njóta, ekki bara aðventunnar, heldur líka stressins sem fylgir. Elskum stressið og lífið leikur við okkur!

Innblástur: TED fyrirlestur Kelly McGonigal, sjá hér.

2-Næðið

Fátt er mikilvægara leiðtogum, hvort heldur það er í stórfyrirtæki eða eigin lífi, en einvera og næði. Einn með sjálfum sér skapast tækifæri til að velta fyrir sér stóru spurningunum. Í þögn og næði, jafnvel með smá bóklestri, gefast tækifæri til að endurmeta, velta vöngum yfir því sem við höfum tekið inn í annríkinu. Tækifæri til að búa okkur undir að svara lífsins spurningum. Þegar á hólminn er komið erum það við og við ein sem þurfum að taka okkar eigin stóru ákvarðanir. Njóttum næðisins, þegar það gefst.

Innblástur: Solitude and Leadership.

3-Kostnaðurinn

Ég er með díl handa þér, nýtt app. Mjög sniðugt. Ég þarf að fá þig til að skrá þig inn í appið og setja inn sem mest af sniðugum texta og myndum fyrir mig, nokkur vídeó væri snilld! Flott ef þú gætir eytt í það nokkrum klukkutímum í mánuði, nokkrir tímar í viku væri enn betra. Er það ekki í lagi? Þú kostar ekkert, er það?

Appið mun safna um þig upplýsingum um allt sem þú gerir og þekkja þig út og inn. Það er rosa gott af því þannig get ég selt réttu auglýsendunum aðgang að þínum tíma og grætt böns of monný. Er það ekki í lagi? Þú kostar ekkert, er það?

Appið er hannað til að vera ávanabindandi og er stillt þannig að þú færð tilkynningar í símann ef eitthvað gerist, skilaboð eða eitthvað sniðugt, svo það geti náð athygli þinni sem best, hvenær sem er. Er það ekki í lagi? Þú kostar ekkert, er það?

Innblástur: Ólafur Jóhann Ólafsson lét vaða á súðum í viðtali og minnti á að við neytendur erum stundum varan hjá arðbærum stórfyrirtækjum.

Þögnin, næðið og tilgangurinn
Þögnin, næðið og tilgangurinn 150 150 Freyr
Ráðgjöf er fallegt íslenskt orð. Að gefa ráð. Þó erum við ráðgjafar ekki endilega þekktastir fyrir gjafmildi okkar þegar kemur að ráðum, heldur mögulega frekar lipurð okkar í að skrifa reikninga fyrir ráðleggingarnar. En mig langar sannarlega að standa undir nafni og gefa þér mín allra bestu ráð. Mig langar að stinga saman nokkrum stefjum sem ég nota til að temja sjálfan mig, enginn endanlegur sannleikur, heldur aðferð sem ég beiti og líður vel með. Þessi pistill er upphafið að pistlaröð sem ég veit ekki enn hvernig endar en ég kalla nú: ,,Besta(ða) útgáfan af sjálfum þér.“ Þögnin, næðið og tilgangurinn Valgeir Guðjónsson spurði í texta sínum, mögulega meira í gríni en alvöru: ,,Hver er tilgangurinn með þessu jarðlífi? […] Hver er ég? Hvar endar alheimurinn? Skyldi’ […] hann enda inni í mér?“ Hver sem hugsun Valgeirs var þykir mér fá stef meira viðeigandi sem upphafsstef. Hefur þú raunverulega tekið þér stund í næði til að velta fyrir þér kjarna þínum og tilgangi? Hverju þú vilt ná fram? Þar til þinn tilgangur er ljós er ég í sömu stöðu og ráðgjafi Lísu í Undralandi, kötturinn, áður en Lísa vissi hvert hún væri að fara. Áður en ljóst er hvert þú stefnir þá skiptir minna máli í hvaða átt þínir fætur feta. Þögnin eða næðið sem þú þarft til að hugsa um þinn tilgang, hoppar ekki upp í fang þitt óumbeðið. Hvort sem þú finnur þína stund í kyrrð snemma morguns, á hjóli, fjallstindi eða á bekk í fjölmenni þá eru miklar líkur á að þú þurfir að hafa fyrir því. Það er nefnilega miklu léttara að fljóta með straumnum og taka við áreitinu, fylgja öðrum. Það kostar orku og áræði að taka um stýrið, taka ábyrgð, útiloka áreitið og líta sér nær, leiða sjálfan sig og aðra. Mín leið er að bóka tíma með sjálfum mér. Ég á bókað stefnumót með sjálfum mér einu sinni í mánuði. Snemma morguns meðan aðrir sofa fer ég yfir minn tilgang í næði. Í upphafi velti ég fyrir mér hlutunum án nokkurs texta. Síðar fann ég mér blað og skrifaði nokkrar línur. Nú er blaðið fullt. Þetta gæti ég kallað stefnumótunarskjal fyrir sjálfan mig. Ég les yfir skjalið og ítra mánaðarlega, breyti því og reyni að bæta, tek nýtt mið. Ég leik mér að því horfa á sjálfan mig og heiminn með augum fugls sem flýgur. Stundum hendi ég inn spurningum eins og, hvað ef ég get allt? Hvað ef það eru engar takmarkanir? Hvað þá? Eða hvernig get ég tryggt að ég skipti engu máli? Fjarlægt sjálfan mig út úr jöfnunni, hvað þá? Aðferðirnar til að finna sig og sinn tilgang eru óteljandi margar, hvaða nálgun þú velur er aukaatriði. Í mínum huga er fátt mikilvægara en að þú takir með vilja þessa ábyrgð á sjálfum sér. Með þessari reglulegu hugarleikfimi tel ég mig nú þokkalega undirbúinn ef ég skyldi rekast á köttinn á förnum vegi.